Om stil te bly en die minste te wees beteken nie jy is swak nie. Dit verg moed en krag. En dit is ook nie die moeite werd om so kwaad te raak nie. Dit is net JOU eie gesondheid wat daaronder ly.|
Source : Internet
Salig! As my nuwe jaar so begin, kan ek vir vir 2011 sê “bring it on!” Gisteraand het ons en ons kinders die oujaar afgesluit met ‘n braai op die plaas. Terwyl ons aan tafel gesit het, het die reën (dit het al eintlik die heeldag gereën en net gestop sodat ons kon braai) saggies op die plaashuis se sinkdak geval. Daar was geskerts aan die tafel, daar was onthou-jy-nogs en, wanneer niemand gekyk het nie, was daar trane in my oë.
Hoe bevoorreg was ek nie!! My man en al my kinders om een tafel. In een huis. In vrede. In oorvloed. In goeie gesondheid. In een stuk. In liefde. Wat meer kan ‘n mens wil hê. Die afgelope tyd het menige mens vir my gevra wat ek wil hê vir 2011.
Sonder om blasé te klink, het ek gesê “niks”. Party het my wel snaaks aangekyk, maar dit is hulle saak. Ek het alles wat ek moet hê en wat ek wil hê. Ek was nog nooit in my lewe materialisties nie. Het al soveel mense met so baie besittings gesien wat sielsongelukkig was.
Die dinge in die lewe wat my gelukkig maak, kos nie geld nie. Kan jy dit nie koop nie. Nie eers op ‘n uitverkoping nie. Hartsgeluk – Vrede – Liefde – Aanvaarding – Vriendskappe – Sonsondergange – Natuurskoon – Reëns – Sonnige dae – Kaggelvure – Geleenthede – Familie – Huweliksgeluk – Gesondheid . . . en nog baie meer.
Vanoggend toe ek wakker word (en manlief wat vir my koffie bed toe bring), is ek skielik opgewonde. ‘n Nuwe jaar . . . nuwe verwagtinge. Ek is so reg soos wat kan kom. En jy? Vir jou wens ek al hierdie dinge hierbo – en nog meer. As jy dit het, is al die ander dinge onnodig.
Ek het gister ‘n mooi sms van ‘n vriendin ontvang. In Engels. Ek deel dit met julle.
“Lke birds, let us leave behind what we don’t need to carry . . . Pain, sadness, bitterness, fear and regrets . . . Fly light – Life is beautiful! If 2010 didn”t end up the way you planned . . . just remember . . . 2011 is created specially for you to start new . . . enjoy every new moment!”
Mag elke oomblik van jou 2011 gevul wees met voorspoed, vrede en vreugde!
Lorraine
Hier het ons dit. Die jaar is klaar. More is ‘n nuwe begin. Met sy eie reëls. Dit is hier wat ek vasskop of vassteek. Solank dit net effektief is.
Ek het nie meer (op my brose ouderdom) enige nuwejaarsvoorneme nie. Dit werk nie. Jammer vir dié wie se lugborrel sopas gebars het. Nuwejaarsvoorneme is uitgedink deur iemand wat die persoonlikheid van ‘n . . . nee wat, laat dit maar ongesê bly.
Wat ek wel het, is ‘n lysie van moets en moenies vir 2011. Nie ‘n lang lysie nie, maar dis belangrik – of, onbelangrik . . . hang af hoe jy daarna kyk.
MOENIE
1. ja sê vir iets of iemand as jy regtig nie kans sien daarvoor nie. (ek kom al mooi reg)
2. musiek luister as dit niks vir jou siel beteken nie (sit liewer die radio af)
3. elke weggooi kat of hond probeer red nie (jou sak en jou gesondheid ly daaronder)
4. lewe om te eet nie – eet om te lewe (ai, dis moeilik, swartwoudkersiekoek roep my gereeld)
5. ander mense se oorlog joune maak nie (soms is jy die enigste slagoffer)
6. biblioteke besoek waar daar nie ordentlike boeke is nie (ek hoop ek kry die regte een)
7. vinniger as die spoedgrens ry nie (ek sien nooit die kameras nie)
8. luister na die weervoorspellings nie (verkeerde voorspellings het al mooi dae geruïneer)
9. weer slaptjips by ‘n wegneemete-plek koop nie (waar kry mens nog outydse slaptjips)
10. sê “nooit weer” nie (het ‘n manier om jou in die rug te kom byt)
MOET
1. genoeg seekos eet (kanselleer die lewe om te eet hierbo uit)
2. in die reën dans tot die water van my ore afloop (solank daar nie weerlig is nie)
3. probeer om van skryfgoed in boekvorm te sit (manlief sal sóóóó bly wees)
4. weer vir my ‘n swart kat kry (ek het ‘n ding oor swart katte)
5. gaan ten-pin-bowling speel (ek dreig al jare)
6. weer begin lees (daar was net nie tyd nie – as daar tyd was kon ek nooit ‘n goeie boek kry nie)
7. begin om weer fotos te neem (ek mis dit en boonop het vriendin Sussa my aangesteek)
8. leer om kerrie soos manlief te maak (as hy weg is, is ek gestrand – hoe water my mond)
9. genoeg tyd inruimvir absolute stilte (ek kom agter my siel smag daarna)
10. iets aan my hare doen (wat weet ek nie)
Nie ‘n indrukwekkende lys nie, maar baie belangrik vir my. Niks aardskuddings nie, maar genoeg om na uit te sien.
Want 2011 gaan MY jaar wees – F.A.K (finish and klaar)
Mag die nuwe jaar vir jou ook jou mooiste jaar wees! Veilig loop!
Lorraine
Vreemd hoe die lewe jou skommel. Ons het 16jr gelede besluit om Kaap toe te kom. Die kinders was klein, ons wou by die see bly. Ons het geskuif. Met die idee om hier by die see te kom aftree. En ons het amper – tot die resessie gekom het. Bouwerk in die kusdorpe het feitlik opgedroog, manlief (wie se ambag messelaar is) moes kompeteer met eks- polisiemanne, onderwysers, staatsamptenare wat ook begin bou het en dan kan jy nie meer appels met appels vergelyk nie.
Geleenthede in die Vrystaat is gunstig vir ons, ek het ‘n lekker werk losgeslaan en begin eersdaag daar. Dit bring mee groot veranderings. Ons moet trek, ons gaan na ‘n kleiner woonplek tot ons weer finansieel sterker is, ek moet dierbare en goeie vriende hier prysgee, ek moet die berge en die see koebaai sê, my katte moet agterbly omdat ons na ‘n woonstel of meenthuis moet gaan. Hulle ken nie perke nie. My hart breek in stukke.
MAAR aan die anderkant is my kinders, my jongste en sy vrou in Bloemfontein, die oudste in Pretoria. Ons gaan mekaar meer sien, meer beleef – iets waaroor ek uitgehonger is. Om jou kinders vir ‘n Sondagmiddagete om jou tafel te kan hê (of ons om hulle tafel) is ‘n voorreg wat min ouers het wat getroude kinders het. Om my oudste een keer ‘n maand te sien in plaas van een keer per jaar is ‘n groot geskenk.
Hierdie afgelope jaar het ons geboelie en gekarnuffel, maar ek dank die Here dat ek en manlief nog saam hierdie skuif kan maak. Dit was ‘n harde jaar, finansieel en gesondheidsgewys. Maar nou kan ons vorentoe kyk. Die Here is goed vir ons.
As daar van julle lesers is wat in Bloemfontein bly, en julle is lus vir koffie en nie vir kuberkoffie nie, bel my. Ek maak altyd ‘n plan vir ‘n geselsie!!